Day 2－新潟，SL磐越物語號

2010年11月28日

行程第二日
搭JR夜火車 [急行]きたぐに到長岡再轉 [新幹線]Ｍａｘとき，
由京都到新潟県的新潟
車費原價：10,610円　　　距離：557.8km

上一次我都有坐過きたぐに來回東京大阪，反而唔想坐夜巴士。
因為怕巴士無位坐，但遲Ｄ可能要坐夜巴士啦！
響日本的夜行列車越來越少，都係因為少人搭而取消…
有Ｄ就係期間限定，例如櫻花季節、夜祭期間等的臨時列車。

北陸日本海的風浪

被我地稱為「地獄列車」的急行きたぐに就係其中一架！
點解叫「地獄列車」？因為佢全車都係自由席，無得book定位！
佢係由大阪開出，經京都、金澤、富山等地，終點係新潟。
但我地係京都上車時，車內的「四人對坐卡位」全都被2人一組的當地人

霸佔。蝦米式，大字型，69式的睡姿都有…
最地獄係車箱的溫度，車外落雪，但車內可以有33度高溫！！
而且坐椅仲要發熱，所以大家明白呢個綽號的由來！
我係網上都見過有日本人用地獄の急行『きたぐに』黎形容過佢架！

今次係きたぐに過夜無上一次咁「地獄」，可能因為溫差無上次咁大掛，
加上到1:00am左右，坐我地對面個女仔就落左車，可以坐得舒服好多！
雖然今次的きたぐに號無熱死人，但就遲大到！
令到我地兩個唔識日文的香港人一見到夠鐘就準備落車！
好彩車長覺得奇怪，見到我地係D細站落車就問我地想去邊，問我地有無落錯車？

咁先無落錯車！

返入車箱，有個日本大嬸用日文加指手畫腳同我地講，話架車遲左，

仲有2個站先到新潟(2個站係要半個鐘= =)…之後佢仲指下Ｄ田，

指下Ｄ地想做導遊咁。我地初時都唔明佢講乜，佢就笑笑口摸下頭
後來我諗返起，佢係想講新潟的米係日本第一，哈哈！
到站時，大嬸仲用好傳統的送別禮儀告別我地，好似拍緊日本古裝戲咁！